Konfrans Haqqında
Hörmətli elm adamları, tədqiqatçılar və biznes dünyasının dəyərli nümayəndələri, Azərbaycan Dövlət İqtisad Universitetinin (UNEC) Türk Dünyası İqtisad Fakültəsinin təşkilatçılığı ilə 16–17 may tarixlərində keçirilmiş “Ortaq Gələcək: Sosial-iqtisadi innovasiyalar” mövzusunda Beynəlxalq Türk Dünyası İqtisad Konfransı uğurla yekunlaşmışdır. Konfransın açılış mərasimində UNEC rəhbərliyi ilə yanaşı, Azərbaycan, Türkiyə, Qazaxıstan, Qırğızıstan və Özbəkistandan gələn akademik heyət çıxış edərək tədbirin əhəmiyyətini vurğulamış, Türk Dünyasında elmi, sosial və iqtisadi əməkdaşlığın gücləndirilməsinin vacibliyini qeyd etmişlər. Tədbir çərçivəsində aşağıdakı mövzuları əhatə edən üç əsas panel müzakirə olunmuşdur;
“Türk Dünyasında Davamlı və Yaşıl İqtisadiyyatın Yeni Dövrü”,
“İnformasiya İdarəetməsi və Süni İntellekt”,
“Gənclik və İqtisadi İnkişaf: Yeni Nəsil Sahibkarlıq və Startaplar”
Panellərdə Türk Dünyasında yaşıl iqtisadiyyatın inkişaf perspektivləri, rəqəmsallaşma və süni intellektin iqtisadi sistemlərə təsiri, həmçinin gənc nəslin iqtisadi və innovativ sahələrdə rolu ilə bağlı aktual məsələlər müzakirə edilmişdir. Konfrans çərçivəsində həmçinin “İqtisadi və İdarəetmə Elmləri” və “İnformasiya Texnologiyaları” mövzularında iki üz-üzə sessiya keçirilmiş, 17 may tarixində isə məruzə göndərmiş iştirakçılarla onlayn sessiyalar təşkil olunmuşdur. Türk Dünyasının müxtəlif ölkələrindən cəlb olunmuş elm adamları, tədqiqatçılar və tələbələr arasında elmi fikir mübadiləsi həyata keçirilmiş, qarşılıqlı təcrübə paylaşımı üçün zəmin yaradılmışdır.
Konfransın sonunda təşkilat komitəsi tərəfindən dəstək göstərmiş qurumlara, panel iştirakçılarına təşəkkür plaketi və xatirə hədiyyələri təqdim olunmuşdur. İki gün davam edən bu beynəlxalq tədbir Türk Dünyasında elmi əməkdaşlığın möhkəmləndirilməsi, ortaq problemlərin elmi əsaslarla müzakirəsi və gələcək inkişaf strategiyalarının formalaşdırılması baxımından əhəmiyyətli platforma kimi dəyərləndirilmişdir. Konfransın təşkili və keçirilməsində iştirak edən, əməyi keçən bütün şəxslərə dərin təşəkkürümüzü bildiririk.
Hörmətlə, Konfransın Təşkilat Komitəsi adına i.f.d. Yusif Əliyev
TR 
EN 
